اسئلة ما الها داعي

لابس و متشيك و ضارب الجل فى شعرك و ريحت البارفان جايبة لغايه اخر الشارع و بتفتح باب الشقة و جاي تنزل تلاقى حد من البيت شافك يقولك ( ايه ده هو انت خارج ؟ )

- لا بجرب افتح الباب اصلهم قالوا فى صباح الخير يا مصر انه الحركة ديه بتنمى الذكاء
=============================

خلصت خروجت و راجع البيت بتفتح الباب و داخل تلاقي الى بينده عليك بعد ما دخلت و يقولك ( انت جيت ؟ )

- لا لسه لما اجى هاقولكم
=============================

قاعد فى اوضتك و كبس عليك النوم اومت اتغطيت و مظبط حالك و طفيت نور الاوضة و لسه بتغمض عينك تلاقى حد بيفتح عليك باب الاوضة ويقولك (ايه ده هو انت هتنام ؟)

- اكيد لا م انت شايفنى برقص باليه اهوه
=============================

او خلاص اتغطيت و طفيت نور الاوضة و عينك هتبتدى تروح فى النوم تلاقى حد بينادى عليك من اوضة تانية
يا حسنين ترد وتقول نعم يقولك ( انت نمت ؟ )

- يااااااااه فى سابع نومة و بتفرج على كابوس كمان
=============================

او روحت مسكت التليفون مسكته و لسه بتضغط عالارقام عشان تتصل تلاقى الى بيقولك
(ايه هو انت هتتكلم فى التليفون و لا ايه ؟)

- لا يا عم دا الكابتن فى الجيم قالى على تمرين صوابع بعمله عالتليفون
=============================

او معزومين عند ناس و لاحاجة و راييحين ترنوا الجرس يفتحلكم طفل او طفلة عساسيييييل اوى يقولكم
( ايه ده انتوا جيتوا؟)

- معلش يا بنى العيب مش عليك انت لسه صغير
=============================

رايح عند بتاع عصير القصب تقوله سلام عليكم فى خروب
يقولك فى سوبيا و عصير قصب و تمر هندى و دوم و مانجة وبرتقال

- طب يا عم قولى مفيش و خلاص ( جربوا السؤال ده بالذات )
=============================

يجيى الراجل نازل من بيتهم الصبح ضارب البدلة و ماسك الشنطة و لسه بيدور العربية و جاى يطلع يلاقى البواب بيخبطله عالازاز و يقوله ( هو انت رايح الشغل يا بيه ؟ )

- لا يا عم رايح العب نيد فور سبيد مع صحابى
=============================

او التليفون رن و رحت رديت قعدت ترغى مع الى اتصل شوية و فى الاخر قفلت السكة
تلاقى بعد شوية حد جاى يقولك (كان حد عايزنى عالتليفون ؟ )

اه يا عم بس انا كلمته بالنيابة عنك و بعدين قفلت معاه ما اكيد لو حد عايزك كنت نادلتك يعنى
=============================

او بتكلم واحد صاحبك من على تليفون البيت تلاقيه بيقولك (انت فين دلوقتى يا بنى ؟)

يااااااااااااه يا عم دانا فى جمصة بصيف
=============================

او يا سلام بقي عايز تروح حتة وتايه مش عارف توصلها قولت اسئل حد تقابل حد تقوله لو سمحت ما تعرفش شارع كذه فين يقولك ( هما قالولك فين ؟ )

طب انا لو عارف هسئل حضرتك على انهى اساس يعنى
=============================
و نخش عالتليفزيوووووووووووووووووووووووووون بقى
-------------------------------------------------------

تلاقى المذيعة فى برامج الاهداءات بترد على اتصال طفل صغير عندك كام سنة يا عمر يقولها 5 سنين تقوله
( انت بتحب بابا و ماما يا عمر ؟)

يعنى اكيد الواد لسه ما طلعلوش عرق الندالة و هيقولك دانا متخانق معاهم وسايبلهم البيت يعنى
=============================

ولا فى برنامج تانى واحد يتصل ترغى معاه شويه و فى الاخر تقوله تسمع معانا اغنية ايه يقولها مثلا اغنية تملى معاك بتاعت عمرو دياب تقوله( ايه ده انت بتحب الاغنية ديه ؟ )

لا طبعا طالبها عشان اشوفها كام دقيقة
=============================

او واحد متصل ليلة العيد تقوله ياترى هتقول ايه بقى لصحابك و قرايبك وجرانك و اخواتك و الدنيا كلها

اكيد هقولهم البقاء لله و نلتقى بعد الفاصل